Mayorya ng Pinoy, ayaw sa POGO – survey

MANILA, Philippines — Inihayag ni Senador Win Gatchalian na lumitaw sa survey na isinagawa ng Pulse Asia Research Inc., na ma­yorya ng Filipino ang hindi pabor sa pananatili ng Philippine Offshore Ga­ming Operators (POGO) sa bansa.

Ang survey, na isinagawa mula Disyembre 3 hanggang 7 noong nakaraang taon na may 1,200 respondents, ay nagpapahiwatig na 85% ng mga na-survey ay hindi pabor sa POGO operations sa bansa.

Batay sa survey, 82% sa National Capital Region, 88% sa Balance Luzon, 93% sa Visayas, at 75% sa Mindanao ay hindi pabor sa POGO operations. Pagdating sa class, 87% ng nasa ABC class, 85% sa D class, at 84% sa E class ay tutol sa operasyon ng POGO sa bansa.

“Ipinakita ng survey na 6% lamang ng mga na-survey sa buong bansa ang pabor sa operasyon ng POGO,” ani Gatcha­lian.

Ang mga pangunahing dahilan na binanggit ng mga respondent para sa kanilang hindi pagpabor ay ang pagtaas ng insidente ng krimen na kinasasangkutan ng mga Chinese national (59%); paglaganap ng mga bisyo (56%); tumataas na bilang ng mga Chinese national na nagtatrabaho sa bansa (48%); pag-iwas sa buwis na ginawa ng ilang POGO operators (39%); kakulangan ng oportunidad na ibinibigay sa mga Pilipino (34%); at pagtaas ng upa o ha­laga ng mga residential o business property (27%). Kasama sa iba pang mga kadahilanang binanggit ang isang paniniwala na ang pagsusugal ay laban sa Islam.

Nang tanungin kung paano dapat kumilos ang administrasyon ni Pa­ngulong Marcos upang malutas ang isyu ng mga POGO sa bansa, ang mayorya ng mga na-survey o 87% ang nagsabi na dapat wakasan ng gobyerno ang operasyon ng POGO sa loob ng 3 buwan.