MANILA, Philippines — Isang 7-anyos na batang babae ang nasawi matapos gulpihin at sakalin ng lalaking may karamdaman sa pag-iisip habang nakaligtas naman ang isa pang bata, naganap kamakalawa sa Brgy. Pili, Sariaya, Quezon.
Kinilala ng pulisya ang nasawing biktima na si Jonalyn Alpuerto, grade 1 pupil habang ginagamot sa ospital si Angelica Mae Rogelio, 8, grade 3, at parehong residente ng Barangay Morong.
Sa report ng Sariaya police, naglalaro ang dalawang bata sa harapan ng kanilang bahay nang lapitan sila ng suspek na si alyas Pocholo at sinabing pinapasundo sila ng nanay ni Angelica.
Nang sumama ang dalawang bata, dinala ang mga ito ng suspek sa magubat na lugar sa Barangay Pili at saka ginapos ng dahon ng “buli”.
Habang nakagapos, pinagsusuntok at saka sinakal ng suspek ang dalawa hanggang sa mawalan ng malay.
Nang magising si Angelica, agad itong tumakbo patungo sa bahay nina Jonalyn at humingi ng tulong sa tatay nito at doon na natuklasan na wala ng buhay si Jonalyn.
Agad nagsagawa ng manhunt operation ang Sariaya police at nahuli ang suspek nang isuko ng kanyang mga magulang sa barangay.
Inamin ng suspek ang kanyang ginawang krimen at lumabas sa pagsisiyasat na hindi naman ginahasa ang dalawang biktima.
Ayon sa suspek ay biglang naging mga manikin ang tingin niya sa dalawang bata.
Nabatid ng pulisya na ang suspek ay may karamdaman sa pag-iisip at bigla na lamang nagbabago ang mood at nawawala sa kanyang sarili.
Nakakulong na sa Sariaya Municipal police station at sinampahan ng kasong murder at frustrated murder.