Motor vs tourist bus: 2 todas, 8 Taiwanese sugatan

MANILA, Philippines — Dalawang lalaking magkaangkas sa motorsiklo ang nasawi nang kanilang sinasakyan ay sumalpok sa kasalubong na tourist bus sa Barangay Langtad, City of Naga, Cebu, kahapon ng madaling araw.

Ang biktima na nasawi noon din ay sina Klyde Morchie Rosada, 18, at Joshua Canceran, parehong taga-Bairan, Naga.

Sa ulat, alas-4:20 ng madaling araw galing sa Cebu City sakay ng motorsiklo ang mga biktima na ­patungong Oslob City habang galing sa Barangay Langtad patungong Naga City proper ang tourist bus na minamaneho ni Richard Varga, 49, residente ng Consolacion.

Ayon kay P/Lt. William Homoc, hepe ng City of Naga Police Station, biglang lumipat umano sa linyang tinatahak ng tourist bus ng Paladin Transport Services ang motorsiklo.

Tinangkang umiwas ang bus na kumabig sa kaliwang lane subalit doon sila nagkasalpukan na kung saan ang bus ay bumangga pa sa pader sa gilid ng highway na ikinasugat ng walong Taiwanese nationals na kinabibilangan ng dalawang bata.