Parak sinibak sa pagpahinto sa daloy ng trapiko sa Commonwealth

Inakalang convoy ni VP Sara ang daraan

MANILA, Philippines — Inalis sa pwesto ang isang pulis na nag­patigil ng daloy ng trapiko sa ka­ha­baan ng Common­wealth Avenue para sa umano’y pagdaan ng  con­voy ni Vice President Sara Duterte.

Ayon kay Holy Spirit Police Station comman­der Lt.Col. May Genio, pinatanggal na niya sa puwesto si Sergeant Verdo Pantallano matapos mag-viral ang video nito sa social media.

“I have ordered the relief of my policeman and put him under investigation to determine administrative liability for his actions. We assure the public that this incident will not happen again,” ani Genio.

Humihingi rin ng paumanhin ang Que­zon City Police District (QCPD), dahil sa kalituhan sa pa­nig ni Pantallano na noo’y nagmamando ng da­loy ng trapiko.

“We would like to apo­logize for the inconvenience we have brought to the motoring public due to the stopping of the traffic flow along Commonwealth westbound,” anang QCPD.

Ayon sa QCPD, nag-“overreact” umano si Pantallano at pinatigil ang daloy ng trapiko “as a sign of courtesy and security” nang magkamali siya ng di­nig sa salitang “VP” at inakalang si Vice President Sara Duterte ang daraan sa lugar.

Subalit,wala roon si Duterte dahil nasa Agusan del Norte ito mula pa noong Miyerkules.

Ipinaabot din ni Pantallano ang kan­yang sorry kasabay ng paha­yag na ina­kala niyang si VP Sara ang tatawid sa Commonwealth.