MANILA, Philippines — Namatay noon din ang mag-asawa matapos pagbabarilin ng riding-in-tandem sa harap ng kanilang bahay sa Zone-2, Brgy. Nogpo, Libon, Albay, kamakalawa ng gabi.
Kinilala ang mag-asawang nasawi na sina Alfredo Bazar Mata at misis na si Relly, barangay kagawad, kapwa nasa hustong gulang at residente ng naturang lugar.
Hindi naman nakilala ang mga suspek na mabilis na nakatakas lulan ng isang motorsiklo patungo sa hindi malamang direksyon.
Sa ulat, alas-9:20 ng gabi ay kararating lang ng mag-asawa mula sa isang lamayan sa Brgy. Rawis lulan ng kanilang motorsiklo.
Bago pa nakapasok sa kanilang bahay ay biglang sumulpot ang dalawang hindi nakilalang armadong lalaki at walang kaabug-abog na pinagbabaril ang mag-asawa na agad nasawi dahil sa mga tama ng bala sa ulo at iba’t ibang bahagi ng katawan.