Preliminary investigation sa mga kaso ni Teves, ikinasa sa Hunyo 13 — DOJ
![Preliminary investigation sa mga kaso ni Teves, ikinasa sa Hunyo 13 � DOJ](https://media.philstar.com/photos/2023/06/07/rep-arnolfo-teves_2023-06-07_21-53-43.jpg)
MANILA, Philippines — Sa Hunyo 13 ay nakatakdang simulan ng panel ng prosecutors ng Department of Justice (DOJ) ang preliminary investigation sa murder at iba pang criminal charges na inihain laban kay Negros Oriental 3rd District Rep. Arnolfo “Arnie” A. Teves Jr. kaugnay ng pagpatay kay Negros Oriental Gov. Roel Degamo at 10 iba pa noong Marso 4, 2023.
Sinabi kahapon ni Senior Deputy State Prosecutor Richard Anthony D. Fadullon na nag-isyu laban kay Teves at lima pang co-respondents ng summons upang maghain ng counter-affidavits sa kasong 10 counts of murder, 14 counts of frustrated murder, at four counts of attempted murder.
Kaya naman, inaasahan ng panel– pinamumunuan ni Senior Assistant State Prosecutor Mary Jane E. Sytat – na maisusumite ni Teves at kanyang co-reposndents ang counter-affidavits sa June 13 o bago sumapit ang petsang ito.
Nasa ibang bansa si Teves, na suspendido pa ng 60 araw bilang mambabatas, sa kabila ng expiration ng kanyang travel authority noong March 9, 2023.
Itinuturo si Teves bilang isa sa utak sa pagpatay kay Degamo na mariin naman nitong itinanggi ang lahat ng alegasyon laban sa kanya.
Kinasuhan si Teves ng National Bureau of Investigation (NBI) bago ang DOJ noong May 17, 2023.
Kinilala ang kanyang co-respondents sa complaint na sina Angelo V. Palagtiw, Neil Andrew Go, Capt. Lloyd Cruz Garcia, Nigel Electona, at isa pang kinilala lamang na “Jie-An,” kapatid umano ni Palagtiw.
Bukod sa kanila, 11 pang nakaditineng suspek ang kinasuhan sa Manila Regional Trial Court (RTC) kung saan lahat ng kaso hinggil sa pagpatay kay Degamo ay iniatas na ilipat sa Supreme Court (SC) alinsunod sa hiling ni Justice Secretary Jesus Crispin C. Remulla.
- Latest