Bawal ang pagbaklas ng plaka ng sasakyan — LTO
MANILA, Philippines — Mahigpit na ipinagbabawal sa mga law enforcer at deputized agent ng Land Transportation Office (LTO) na magbaklas ng plaka ng mga nahuhuling sasakyan.
Ito ang niliwanag ni LTO Chief Jay Art Tugade sa gitna ng mga reklamo ng publiko hinggil sa sinasabing pagbabaklas ng plaka ng mga sasakyang nasasangkot sa paglabag sa batas-trapiko.
Nakasaad sa isang memoramdum na nilagdaan ni Tugade na ang hakbang ay tumutukoy sa probisyon ng umiiral nang Joint Administrative Order (JAO) No. 2014-01 na nagsasaad na ang lisensya sa pagmamaneho, student permit, o ang sasakyan ay maaari lamang isailalim sa alarma kung hindi agad maipapataw o mababayaran ang kaukulang multa sa hinuling drayber o sasakyan.
Nakasaad pa sa memorandum na ang lahat ng LTO law enforcers at deputized agents ay hindi dapat baklasin ang mga plaka ng mga nahuhuling sasakyan na lumabag sa batas trapiko.
Tiniyak naman ni Tugade sa publiko na ang central command center ng ahensya ay maagap na makapaghahatid ng impormasyon sa mga tauhan nito sa lansangan hinggil sa mga naka-alarmang sasakyan.
- Latest
