MANILA, Philippines — Sinopla at tinawag na fake news ni suspended 3rd District Negros Oriental Rep. Arnie Teves Jr., ang naging anunsyo kamakalawa ni Justice Secretary Jesus Crispin “Boying” Remulla na uuwi na siya ng bansa kahapon.
“Dapat tinanong muna nila ako bago sila nagsalita, di ba?” pahayag ni Teves sa mensahe nito sa tanong ng ilang reporters sa Kamara.
Magugunita na kamakalawa ay inihayag ni Remulla, mayroon umano siyang reliable source na nagsasabing uuwi na si Teves sa bansa matapos tanggihan ng Timor-Leste ang kahilingan na asylum.
Tumanggi naman si Teves na magkomento sa kanyang asylum application sa Timor-Leste.
“Tanungin na lang ninyo si Boying. Alam niya siguro yun. Mas marami siyang alam sa akin,” dagdag pa ni Teves na ang tinutukoy ay si Remulla.