MANILA, Philippines — Hindi na aabot hanggang P700 ang presyo ng kada kilo ng sibuyas sa bansa, tulad ng nangyari noong nakaraang panahon ng Kapaskuhan.
Ito ang tiniyak kahapon ni Department of Agriculture (DA) Assistant Secretary Rex Estoperez, sa gitna na rin nang patuloy na pagtaas ng presyo ng sibuyas sa mga pamilihan.
Ayon kay Estoperez, hindi na mangyayari ang sobrang pagmahal ng presyo ng sibuyas dahil mayroon pa namang mga stock ng sibuyas sa mga cold storage.
“Hindi na babalik ‘yon kasi kung talagang puwersahan na, let’s open the warehouses kasi it’s emergency already na ganoon ang presyo ulit,” paliwanag pa niya sa panayam sa teleradyo.
Matatandaang noong holiday season ay sumikad ng hanggang P700 kada kilo ang presyo ng sibuyas sa bansa, bunsod ng kakulangan nito ng suplay.
Unti-unti namang napababa ang presyo ng sibuyas nang umangkat na ang pamahalaan sa ibang bansa at umani na rin ng kanilang mga pananim ang mga magsasaka.