Single ticketing system aarangkada na
MANILA, Philippines — Ngayong araw (Mayo 2) ang pilot implementation ng single ticketing system para sa mga paglabag sa trapiko na ginawa sa National Capital Region (NCR).
Ito ang ipinaalala ni Metropolitan Manila Development Authority (MMDA) spokesperson Melissa Carunungan na susubukin muna nila ang sistema sa mga piling lugar upang matukoy ang anumang lapses o adjustments bago ito ilunsad sa buong rehiyon o sa buong bansa.
Ang mga kalahok na local government units ay ang Lungsod ng Maynila, Lungsod Quezon, Lungsod ng Parañaque, Lungsod ng Muntinlupa, Lungsod ng Caloocan, Lungsod ng Valenzuela, at Lungsod ng San Juan.
“Ito ay magiging malaking ginhawa para sa mga motorista dahil sa loob ng single ticketing system, ang top 20 most common traffic violations ay may pare-parehong multa, contesting procedures, at digital payment platforms kagaya ng GCash, Maya, at Landbank,” ani Carunungan.
Kasama sa Metro Manila Traffic Code of 2023, na magsisilbing guideline para sa system, ang mga parusa para sa mga sumusunod na paglabag sa trapiko:
Disregarding traffic signs, Illegal parking (attended and unattended), Number coding UVVRP, Truck ban, Light truck ban, Reckless driving, Unregistered motor vehicle, Driving without license, Tricycle ban, Obstruction, Dress code for motorcycle, Overloading, Defective motorcycle accessories, Unauthorized modification, Arrogance/discourteous conduct (driver), Loading and unloading in prohibited zones, Illegal counterflow at Overspeeding.
Ang multa para sa mga paglabag na ito ay mula P500 hanggang P5,000, ayon sa MMDA.
Sinabi ni Carunungan na maglalagay din ang MMDA ng 900 enforcer para sa pagpapatupad ng single ticketing system.
- Latest
