MANILA, Philippines — Patay ang pitong katao habang nasa 150 pamilya ang nawalan ng tahanan sa naganap na sunog, kamakalawa sa Brgy. San Juan, Taytay, Rizal.
Batay sa ulat ng Bureau of Fire Protection (BFP), alas-9:47 ng gabi kamakalawa nang sumiklab ang sunog sa Rosario St., ng nasabing barangay.
Ayon sa Taytay Acting Fire Marshal, F/Insp. Gary Raymon Cantillon, pitong katao ang nasawi sa naturang sunog habang isa ang nasugatan.
Hindi naman agad nakuha ang pagkakakilanlan ng mga biktima, ngunit sinasabing kabilang sa kanila ay isang dalawang taong gulang na sanggol at isang senior citizen na nasa 60-anyos.
Tinangka pa umano ng mga biktima na makalabas ng kanilang nasusunog na tahanan ngunit hindi nila nagawa dahil ang kanilang tahanan ay nasa dulo ng kalsada.
Natagpuan na lamang ng mga otoridad ang bangkay ng mga biktima sa kusina at banyo ng tahanan.
Umabot pa ng ikatlong alarma ang sunog bago tuluyang naideklarang fireout, alas-11:05 ng gabi.
Sa pagtaya ng mga otoridad, aabot sa 60 pamilya ang naapektuhan ng sunog na tumupok sa 40 bahay habang tinatayang nasa P1.5 milyon naman ang halaga ng mga ari-ariang tinupok nito.
Sinasabing isang electric fan na nag-overheat na ang posibleng sanhi ng sunog ngunit masusi pa itong iniimbestigahan sa ngayon