MANILA, Philippines — Kinumpirma kahapon ni Justice Secretary Jesus Crispin Remulla na itinuturing na ang suspendidong si Negros Oriental 3rd District Rep. Arnolfo Teves bilang isa sa posibleng “masterminds” sa kaso ng pagpatay kay Negros Oriental Gov. Roel Degamo at walong iba pa noong Marso 4, 2023.
Sa pulong-balitaan, sinabi pa ni Remulla na hinahanap pa nila ang dalawa hanggang sa tatlong utak sa pagpaslang kay Degamo.
“They can be contacted. I think meron namang nasa social media dyan. ‘Yung isa, meron nag-text sa akin. I told you last week, Cong. Teves texted me. They are being considered as masterminds,” anang kalihim.
Umuusad naman aniya ang imbestigasyon na kanilang ginagawa.
Sinabi rin ni Remulla na si dating Negros Oriental governor Pryde Henry Teves, ang nakababatang kapatid ni Cong. Teves ay maaaring masangkot din sa kaso ni Degamo kasunod nang pagsalakay sa kanyang sugar mill noong Linggo na kung saan ay ilang matataas na armas, bala, at pampasabog ang narekober sa 50-ektaryang compound nito sa Barangay Caranoche, Santa Catalina mula Biyernes hanggang Linggo.
Sinabi rin ni Remulla na ang mga suspek na naaresto sa kaso ni Degamo ay nagsabing nakita nila ang paggawa ng mga pampasabog na natagpuan sa raid.
“Well this is used for terrorism, used for assassination, to create havoc, to kill people, nakita niyang ginagawa niyan, and yung gumagawa noon that he said, yung gumagawa non was part of the people arrested also, na kasama sa mga sumurrender,” wika ni Remulla.
Isasailalim sa preliminary investigation ang nakababatang Teves at tiniyak na igagalang ang lahat ng karapatan ng lahat ng nasasangkot sa kaso, kabilang ang kanilang karapatan sa due process. - Doris Franche-Borja