P.5 milyong reward sa holdaper na pumatay sa New Zealander
MANILA, Philippines — Nagpalabas ng P500K na reward money ang pulisya sa sinumang makapagtuturo sa kinaroroonan ng isa sa dalawang holdaper na pumatay sa isang turistang New Zealander noong Linggo ng madaling araw sa Makati City.
Ito ang inihayag ng pamunuan ng Southern Police District (SPD) na kung saan ang isa sa dalawang holdaper na responsable sa pagpatay ay tukoy na nila.
Sinabi ni SPD P/Brig.General Kirby John Kraft na ang suspek ay kinilalang si John Mar Nagum Manalo, residente ng Bicutan, Taguig City.
Ang pagkatukoy kay Manalo ay batay sa salaysay ng apat na testigo ng task group at sa pamamagitan ng rogue gallery ng Makati City Police Station na iniharap sa kanila na kung saan ay positibong itinuro ang suspek na isa sa riding-in-tandem na nangholdap at nakapatay kay Nicholas Peter Stacey, 34 sa bahagi ng Filmore St., Brgy. Palanan, Makati, dakong alas-12:25 ng madaling araw noong Linggo kasama ang nobya nitong Pinay.
Natuklasan din na ang suspek ay may standing warrant of arrest sa kasong robbery with violence against intimidation of persons na inilabas sa Regional Trial Court Branch 12, Malolos City Bulacan.
Nakatakdang sampahan ng kasong robbery with homicide ang suspek sa oras na makumpleto na ang iba pang kaukulang dokumento.
Sinabi ni Kraft na kahit wala pang warrant of arrest para sa kaso ng pagpatay kay Stacey ay maaaring arestuhin anumang oras ang suspek na si Manalo dahil may standing warrant of arrest naman laban sa kaniya mula sa nasabing korte.
Nabatid na si Manalo ay nakasuot ng face mask, subalit nakababa umano nang isagawa ang panghoholdap at pamamaril habang ang driver ng motorsiklo ay nakasuot ng helmet kaya hindi nakita ang mukha.
Inaalam pa sa Land Transportation Office (LTO) ang plate number na nakuha sa sinakyang motorsiklo ng mga suspek kung genuine o tampered.
Lumalabas na gawain na umano ng suspek ang panghoholdap.
Nanawagan na rin si Kraft sa publiko na makipagtulungan para mabigyan ng hustisya ang biktima sa pamamagitan ng pagbibigay ng impormasyon na makakatulong para maaresto ang suspek.
- Latest
