MANILA, Philippines — Isang bagong silang na sanggol na tinatayang isang araw pa lamang naisisilang ang natagpuan sa loob ng isang public cemetery sa Brgy. Dungawan Central, Guinayang, Quezon, kamakalawa ng hapon.
Ayon sa pulisya, isang Joven Nuga ang nakakita sa sanggol na lalaki na nakalagay sa loob ng sako at may nakakabit pang ambilical cord, alas-3:20 ng hapon.
Naglalakad umano si Nuga sa sementeryo nang makarinig siya ng walang tigil na iyak ng sanggol at nang hanapin ay doon na niya ito nakita na halos nilalanggam na.
Mabilis na dinala sa Guinayangan Community Medicare Center ang sanggol at isinailalim sa medikasyon at ngayon ay nasa mabuti ng kalagayan.
Hinahanap na ng pulisya ang walang pusong ina ng sanggol na nag-abandona dito upang papanagutin. — Ed Amoroso