MANILA, Philippines — Patay ang limang katao nang manlaban umano sa mga pulis na magsasagawa ng pag-aresto sa isa sa napatay sa kasong droga noong Martes sa Lambayong, Sultan Kudarat.
Kinilala ni Brig. Gen. Jamili Macaraeg, director ng Police Regional Office-12, ang mga napatay na sina Adhen Salbo; Razul Luyugan Dalandang; Ivan Kilapan Macmod, Nasrudin Banto Abdilla at Sadam Mamadtud Abdul.
Ayon kay Macaraeg na nagkaroon ng engkuwentro nang pagbabarilin ng limang suspek ang pulis na patungo sa kanilang hideout sa Sitio Mapayag, Barangay Pimbalayan ng nasabing bayan.
Sa hideout ng mga suspek ay nakumpiska ang nasa 50 gramo ng shabu na nagkakahalaga ng P340,000; mga baril, shotgun, 2 kalibre 45 pistol at .45 Ingram machine pistol at M16 assault rifle.
Nabatid na nagtungo ang mga pulis sa lugar upang arestuhin si Salbo dahil sa may nakabinbing kasong droga.