Lolo naningil ng utang sa tanod, tepok sa suntok
MANILA, Philippines — Namatay noon din ang 62-anyos na lolo nang bumagsak ang ulo sa semento matapos suntukin ng barangay tanod na sinisingil nito ng utang naganap, kamakalawa sa Bucay, Abra.
Kinilala ang nasawing biktima na si Jacinto Tenebro, habang nadakip naman ang suspek na kinilalang si Ronald Tagura, 40 at kapwa residente sa Barangay Bugbog ng nasabing bayan.
Batay sa report ng Bucay Municipal Police Station, naganap ang insidente nitong Huwebes sa nasabing lugar.
Lumabas sa imbestigasyon ng pulisya, nag-iinuman ang dalawa nang bigla lamang umanong uutang ang suspek sa biktima.
Sinabihan ng biktima ang suspek na bayaran muna nito ang nauna pa niyang inutang na ikinagalit ng suspek hanggang sa pinagsusuntok si Tenebro.
Sa lakas ng pagkakasuntok, bumagsak ang biktima at tumama ang ulo nito sa semento na naging sanhi ng kanyang kamatayan.
Mabilis naman nadakip ang suspek ng mga rumespondeng pulis na ngayon ay nahaharap sa kasong homicide.
- Latest
