Vhong Navarro kinasuhan ng rape sa Taguig RTC

MANILA, Philippines — Sinampahan ng Taguig City prosecutors ng kasong  rape si  comedian-host Vhong Navarro sa umano’y panghahalay sa model na si  Deniece Cornejo noong 2014.

Nabatid na noong Agosto 31 nang isampa ng piskalya sa  Taguig City Regional Trial Court na kung saan si Navarro ay inakusahan na nilasing at ginahasa si Cornejo noong Enero 17, 2014 sa kanyang condo unit sa Taguig City.

Ang pagsasampa ng kaso laban kay Navarro ay matapos paboran ng  Court of Appeals ang isinampang petisyon ni Cornejo sa pagbasura ng kaso ng Department of Justice.

Matatandaan na nitong Hulyo 21, naglabas ng kautusan ang Court of Appeals (CA) sa Taguig City Prosecutor’s Office na sampahan ng kasong rape si Navarro makaraang baligtarin nito ang unang resolusyon ng DOJ.

Sa resolusyon ng DOJ noong Abril 2018, tinanggihan nito ang petition for review ng kampo ni Cornejo na kumukuwes­tiyon sa resolusyon noong Setyembre 2017 na nagsasabi na walang ‘probable cause’ para sampahan ng kaso si Navarro sa korte.

Ayon sa CA, hindi tamang venue ang ‘preli­minary investigation’ para madetermina ang pagiging inosente o pagiging guilty ng isang respondent sa isang kaso.