Marcos admin planong idiskaril ng CPP-NPA-NDF

MANILA, Philippines — Ibinulgar ng dalawang dating mi­yembro ng Communist Party of the Phi­lippines, New People’s Army, National Democratic Front (CPP-NPA-NDF) na may plano ang grupo na hindi payagang makaupo si President-elect Ferdinand “Bongbong” Marcos Jr., ka­ya’t nagpakana umano ang mga ito ng kaguluhan sa Hacienda Tinang sa Concepcion, Tarlac.

Sa ‘virtual’ balitaan ng National Task Force to End Local Communists Armed Conflict (NTF-ELCAC), sinabi ni Christopher Garcia, dating alias “Ka Warly” na ang komunistang grupo  ang itinuturong utak ng ‘bungkalan’ sa Hacienda Tinang.

Ang terminong “bungkalan” ay kilos kampanya ng CPP-NPA-NDF sa mga pinag-aagawang lupain gaya ng nangyari sa Hacienda Luisita.

Aniya, ang insidente sa Hacienda Tinang ay unang hakbang lamang upang idiskaril ang panunumpa ni Marcos sa Hunyo 30 at hihimukin ng mga komunista ang mga magsasaka na magsasagawa ng kaguluhan sa pangunguna ng Anak Pawis at Unyon ng Mangga­gawang Agrikultura (UMA).

Sinabi naman ng dating miyembro ng nasabing grupo na si  Ka Pong Sibayan, hindi papayagan na makaupo si Marcos at isang negosyo ang mang­yayaring kilos-protesta ng komunis­tang grupo para makokolekta ang pondo na hindi napupunta sa mga mag­sasaka.

Una nang tiniyak ng PNP ang seguridad sa inagurasyon ni Marcos na gagawin sa National Museum sa ka­bila ng mga planong protesta.