Sara ‘di na tatakbong mayor ng Davao City
MANILA, Philippines —Inanunsyo kahapon ni Davao City Mayor Sara Duterte-Carpio na hindi na niya itutuloy ang pagtakbo bilang alkalde ng lungsod ilang araw bago ang deadline para sa substitution ng mga kandidatong tatakbo sa eleksiyon sa 2022.
Sinabi ni Sara na papalit na tatakbo sa pagka-alkalde ay si incumbent Vice Mayor Baste Duterte.
“Ngayong hapon wini-withdraw ko ang aking kandidatura sa pagka-Mayor ng Davao City. Si VM Baste ang papalit sa akin. Si Atty. Melchor Quitain ang nominado namin sa pagka-Bise Alkalde. Ito lamang po muna. Maraming salamat po,” pahayag ni Duterte-Carpio.
Matatandaan na bago nito, inanunsyo rin ni Baste na iniurong niya rin ang kanyang reelection bid sa pagkabise-alkalde ng Davao City.
Ang nakatatandang kapatid na lalaki ni Baste na si Paolo “Pulong” Duterte ay tumatakbo muli bilang Kongresista ng lungsod ng Davao habang ang kanilang ama na si Pangulong Rodrigo Duterte ay itinutulak ng mga kapartido nito sa PDP –Laban Cusi faction na kumandidatong Senador.
Marami ang nag-aabang sa posibleng tambalan nina Duterte-Carpio at dating Senator Ferdinand “Bongbong” Marcos. - Joy Cantos
- Latest
