Dayuhan,3 pa inaresto…
MANILA, Philippines — Dalawang tinedyer na babae ang nasagip ng mga tauhan ng Philippine National Police Anti-Cybercrime Group (PNP-ACG) habang naaresto naman ang isang dayuhan at tatlong miyembro ng cyber sex syndicate na nagpapalabas ng online sex sa internet sa Pampanga, kamakalawa ng gabi.
Sa ulat na nakarating kay PNP chief PGen. Debold Sinas, kinilala ni PBGen Robert Rodriguez, acting director ng ACG, ang mga suspek na sina Easton Scot Sanderson, 34, American citizen; Reneilyn Robles, 22, ng Lawang Bato, Valenzuela City; Jan Arielle Mondejar, 33, ng Sta Rosa City, Laguna at Shirley Martinez, 22, ng Sta Rita, Calbayog City.
Sinabi ni Sinas, lumalabas na si Sanderson ang bidang lalaki at ang mga kabataang kanilang hinikayat ang kanyang katalik sa ginagawang video na kinukunan naman ng mga umano’y crew na sina Robles at Martinez habang si Mondejar ang tumayong recruiter.
Naaresto ang mga suspek sa tinutuluyan ni Sanderson sa Unit JO3 Kandi Tower, Flora St., Brgy Malabanias, Angeles City bandang alas-11:00 ng gabi ng Martes.
Sa salasay ng dalawang nasagip na kabataan na nasa edad 18 at19, na-recruit sila ni Mondejar para sa modeling at photoshoot, subalit nang ipakilala na sila sa dayuhang si Sanderson ay puwersahan na silang pinakipagtalik dito habang kinukunan ng video ng iba pang suspek upang ma-upload sa porn site sa internet.
Makikipag-ugnayan ang PNP sa NBI agents sa Maynila upang matukoy ang pornographic site kung saan ikinakarga ng mga naarestong miyembro ng cybersex syndicate ang video upang maging dagdag na ebidensiya sa piskalya.
Ang mga naarestong suspek ay sasampahan ng kasong paglabag sa Anti-human Trafficking Act in relation to Cybercrime Prevention Act of 2012.