Xander Ford inaresto sa kasong physical abuse at sexual assault sa ex-gf

MANILA, Philippines — Inaresto kamakalawa ng gabi ng mga otoridad ang kontrobersyal na aktor at social media personality na si Xander Ford sa bisa ng warrant of arrest sa mga kasong isinampa ng kaniyang dating nobya.

Sa ulat ng MPD Intel Section, alas-7:30 ng gabi nang arestuhin sa loob ng isang restoran sa may Roxas Boulevard sa East Service Road, Pasay City si Xander Ford o Marlou Arizala sa totoong buhay, 24, nakatira sa San Francisco Sunnybrooke 2, Section 8, General Trias, Cavite.

Hindi na nakapalag si Arizala nang ihain sa kaniya ng mga pulis ang warrant of arrest para sa kasong paglabag sa Republic Act 9262 o Violence Against Women and their Children Act, na isinampa ng dating nobya ni Arizala na si Ysah Cabrejas.

Itinanggi ni Arizala ang mga akusasyon at inakala na nagkasundo na nang mag-usap sila ng dating kasintahan, ngunit itinuloy rin pala nito ang kaso.

Ibinalik na ang warrant of arrest sa sala ni Judge Maria Celestina Cruz-Mangrobang ng Manila Regional Trial Court Branch 38 na naglaan ng P18,000 piyansa para sa pansamantalang kalayaan ni Arizala.