Tiamzon couple kulong ng habambuhay
Guilty sa kidnapping at serious illegal detention...
MANILA, Philippines — Habambuhay na pagkabilanggo na aabot sa 40 taon ang inihatol ng Quezon City Regional Trial Court laban sa mag-asawang National Democratic Front (NDF) peace consultants Benito at Wilma Tiamzon matapos mapatunayang nagkasala sa kasong kidnapping at serious illegal detention noong 1988.
Bukod sa life imprisonment, inatasan din ni QC Presiding Judge Alfonso Ruiz II na magbayad ng P75,000 bilang moral damages, P75,000 bilang civil indemnity at P75,000 bilang exemplary damages sa complainant na si Lt. Claro Casis.
Ang kaso ay nag-ugat sa pagdukot kina Army Lts. Clarito Santos, Oscar Singson, Rommel Salamanca, at Abraham Claro Casis ng AFP at Sgt. John Jacob ng Philippine Narcotics Command sa Quezon province noong June 1, 1988.
Nakasaad sa charge sheet na naisampa noong June 26, 1990, ang mga dinukot na military personnel ay itinago ng 75 araw sa Mauban, Quezon.
Ang mag-asawang Tiamzon ay unang napalaya noong 2016 matapos payagan ng korte sa Maynila na makapagpiyansa upang makiisa sa peace talks sa pagitan ng rebeldeng komunista at ng pamahalaan pero naibasura ni Pangulong Rodrigo Duterte ang usaping pangkapayapaan at muling nagkaroon ng negosasyon noong 2017.
Noong 2018, iniutos ng QC court na muling arestuhin ang mag-asawang Tiamzon at kapwa akusadong si Adelberto Silva dahil sa paghinto ng peace talks.
Pinaniwalaan ng QC court ang testimonya ni Casis na nagsabing sila ay papunta ng Maynila nang dukutin ng mga rebeldeng NPA sa may boundary ng Tiaong at Candelaria Quezon at sila ay ikinulong mula June 18, 1988 hanggang August 12, 1988 at nakakalabas lamang pag may personal na kailangan at may interrogation.
Sinabi ni Casis na noong sila ay nakapiit ay nakita niya ang mag-asawang Tiamzon na nangangasiwa ng miting sa iba pang miyembro ng grupo.
Hindi naman nakumbinsi ang korte sa pahayag ng depensa na hindi ang mag-asawang Tiamzon ang nakita ng complainant at nakilala lamang ito sa mga litrato sa mga pahayagan at sa mga litrato na naipakita dito ng militar makaraan itong makalaya.
Ayon sa korte, maliwanag na nakita at namukhaan ni Casis ang mag-asawa kahit na ito ay nasa loob ng kanyang selda.
Naestablisa rin ni Casis na ang mag-asawang Tiamzon ay may kinalaman at sabwat sa grupong kumidnap sa kanila at nagkulong sa kanila ng mahabang panahon.
- Latest
