Dialysis center itatayo ng ACT-CIS

MANILA, Philippines — Para higit pang maka­tulong sa mga mahihirap at may sakit na pasyente sa bansa ay plano ng ACT-CIS na magpatayo ng isang dialysis center sa Metro Manila.

Ayon kay Cong. Eric Yap, libre ang pagpapagamot sa ipapatayong dia­lysis center at may ilang private firms na ang nag-pledge na magbibigay ng anim na dialysis machine sa ACT-CIS.

“Kailangan muna na­ming maghanap ng isang gusali na paglalagyan ng mga makina, kama at iba pang pasilidad na magagamit ng mga pasyente,” anang mambabatas.

Kukuha rin ang ACT-CIS ng doktor, nurse at iba pang medical staff para magpatakbo ng mga nasabing makina at personal na tumingin sa mga pasyente.

Ani Cong. Yap ay libu-libong Pilipino ang dina-dialysis araw-araw sa buong bansa dahil sa sakit sa kidney at iba pang karamdaman.

Ang libreng dialysis ay bahagi ng pangako ng ACT-CIS na tumulong sa mga mahihirap at walang malapitang pamilya sa kanilang pagpapagamot.