MANILA, Philippines — Itinalaga ni House Speaker Alan Peter Cayetano si ACT-CIS partylist Rep. Eric Go Yap bilang caretaker ng lone district ng lalawigan ng Benguet matapos mamatay nitong Disyembre ang kanilang kongresista na si Nestor Fongwan Sr.
Kaya naman tiniyak ni Rep Yap ang kanyang matapat at mapagkakatiwalaang serbisyo kasabay ng pagtanggap sa hamon na ibinigay sa kanya bilang caretaker ng lalawigan.
Bagama’t aminadong hindi tubong Benguet, iginiit naman ni Yap na naging malaking bahagi sa kanya ang probinsya noong siya ay ahente pa lamang ng iba’t ibang produkto at nagsisimula sa kanyang karera bago maging isang matagumpay na negosyante.
Iginiit naman ni Yap na wala siyang balak tumakbo sa anumang political position sa Benguet at susundin lamang niya ang ibinigay na tungkulin sa kanya bilang caretaker ng Benguet.
Sa mga susunod na araw nakatakdang bisitahin ng mambabatas ang Benguet sa kauna-unahang pagkakataon matapos itong maitalagang caretaker ng lugar.