120k pulis ipapakalat sa balik-eskwela
27.8M estudyante papasok…
MANILA, Philippines — Tinatayang aabot sa 120,000 mga pulis sa buong bansa ang ipapakalat ngayong unang araw kaugnay nang pagbubukas ng klase ngayong araw.
Ayon kay Col. Bernard Banac, tagapagsalita ng Philippine National Police (PNP), handang-handa na sila sa pagbibigay ng seguridad sa mga mag-aaral na magbabalik eskwela ngayong araw.
Sa 120, 000 pulis na ipapakalat sa buong bansa ang 7,000 dito ay sa Metro Manila para magbantay sa mga paaralan at unibersidad.
Nilinaw naman ni National Capital Region Police Office (NCRPO) chief Guillermo Eleazar na magpapatrulya pa rin sa mga lansangan sa Metro Manila na patungong mga eskwelahan ang mga pulis.
Gayundin sa mga bus terminals, vital installation para magsagawa ng mga anti-criminality efforts para mabawasan o maiwasan ang mga posibleng mangyaring krimen na may kaugnayan sa pagbubukas ng klase.
Sa datos ng Department of Education (DepEd) tinatayang 27.8 milyon estudyante sa buong bansa ang inaasahang magbabalik eskwela ngayong taon.
Idinagdag pa ni Eleazar na makakatuwang nila sa pagbabantay ang mga opisyal ng barangay para sa pagpapanatili ng maayos na daloy ng trapiko sa paligid ng mga eskwelahan.
Bagamat wala naman umanong natatanggap na banta sa seguridad ng mga mag-aaral ang pulisya ay mananatili pa ring alerto laban sa mga magnanakaw o masasamang loob na mambibiktima ng mga estudyante.
Pinaalalahanan naman ni Banac ang mga magulang na huwag hayaang magdala ng mamahaling gadgets ang kanilang mga anak para hindi mabiktima ng mga kriminal.
Nakaalerto rin umano ang mga pulis laban sa paglaganap ng ilegal na droga sa mga paaralan dahil sa madaling mahikayat na gumamit nito ang mga estudyante partikular na sa high school students at party drugs naman sa mga college students.
- Latest
