Joy Belmonte lamang sa latest survey
MANILA, Philippines — Lamang ng 26 porsyento si Vice Mayor Joy Belmonte kay Rep. Bingbong Crisologo sa pagka-alkalde ng Quezon City.
Ito ang lumabas sa pinaka-latest at non-commissioned survey sa National Capital Region (NCR) mayoralty race ng RP-Mission and Development Foundation Inc. (RPMDinc) na isinagawa nitong Abril 1 hanggang Abril 8 ng taong kasalukuyan.
Sa 8,000 registered voters na tinanong ay nakakuha ng 62 percent si Belmonte habang si Crisologo ay 36 percent, samantalang si dating Congressman Chuck Mathay ay 1 percent.
Ayon kay Dr. Paul Martinez ng RPMDinc, mga malalaking pangalan, kilalang political families, mga bata at incumbent ang ‘top choice’ ng mga botante.
Sa Makati ay nakakuha ng 67% si Abigail Binay; Toby Tiangco (66%) sa Navotas City, Imelda Calixto-Rubiano (71%) sa Pasay City; Lino Cayetano (70%) sa Taguig City;, Bobby Eusebio (68%) sa Pasig City.
Sa Maynila si dating Vice Mayor Francisco “Isko Moreno” Domagoso ay nakakuha ng 47 percent. Si incumbent Mayor Erap Estrada ay 30 percent habang si dating Mayor Alfredo Lim ay 15 percent.
Sa Taguig City, si ex-Rep. Lino Cayetano, bayaw ni incumbent Mayor Lani Cayetano ay mahirap talunin sa botong 70 percent laban kay Congressman Arnel Cerafica na may 27 percent rating lamang.
Napanatili naman ni Pasig City Mayor Roberto “Bobby” Eusebio ang kanyang strong lead na 68 percent laban kay City Councilor Vico Sotto, na anak ng television host na si Vic Sotto, na nakakuha ng 29 percent.
Nanguna rin sa survey si dating San Juan Vice Mayor Francis Zamora na may 55 porsiyento na ngayon, laban sa 43 porsiyento lamang ni Vice Mayor Janella Estrada.
Sa lungsod naman ng Mandaluyong, Malabon, Caloocan, Las Piñas, Marikina, Valenzuela, Parañaque at Muntinlupa, ang mga incumbent candidates ay mistulang nakakatiyak na ng panibagong termino, kabilang sina Mayor Menchie Abalos na may 97%, Mayor Lenlen Oreta na may 65%, Mayor Oca Malapitan (95%), Mayor Mel Aguilar (92%), Mayor Marcelino Teodoro (96%), Mayor Rex Gatchalian (94%), Mayor Edwin Olivarez (57%) at Mayor Jaime Fresnedi (58%).
- Latest
