MANILA, Philippines — Dahil sa plano ng national government na magsagawa ng major rehabiltation sa Manila Bay ay pinatutukan ni Manila Mayor Joseph Estrada kay City Administrator Ericson Alcovendaz ang maayos na waste disposal ng mga istrakturang pag-aari ng local na pamahalaan.
Pinatututukan ni Mayor Estrada ang Manila Zoo na kabilang sa nabanggit ng DENR na walang maayos na waste disposal system upang matiyak na makakatutugon ito sa Environmental Code Ordinance 8371 na naipasa ng konseho sa ilalim ng kanyang termino.
Bukod dito ay pagsasagawa ng imbentaryo sa mga gusali na pag-aari ng city government para sa lalong madaling panahon ay magawan ng mga tamang waste disposal ang mga ito bago pa magsimula ang rehabilitasyon ng Manila Bay.
Tiniyak ni Estrada na suportado niya ang proyektong rehabilitasyon ni Pangulong Duterte kaya’t ngayon pa lamang ay pinaiinspeksiyon na rin niya ang iba pang city owned premises na posibleng direktang nagtatapos sa Manila Bay.