Tapyas pasahe, presyo ng bilihin, iginiit
Sa pagmura ng petrolyo...
MANILA, Philippines — Ilang grupo ang itinulak na maibaba ang presyo ng pasahe at mga bilihin kasunod nang pagbaba ng presyo ng mga produk tong petrolyo sa ikalimang sunod-sunod na linggo.
Noong Lunes ay naghain ang United Filipino Consumers and Commuters (UFCC) sa Land Transportation Franchising and Regulatory Board (LTFRB) ng petisyong ibalik sa P8 ang pasahe sa jeep dahil sa patuloy na pagbaba ng presyo ng langis sa pandaigdigang merkado.
“Nais po naming ibalik sa P8... Alam naman po natin na bumubuti na po ang kalagayan sa pandaigdigang pamilihan ng petrolyo,” ani UFCC president RJ Javellana.
Sa ilalim ng petisyon, kinatuwiran ng grupo ang pagsuspende sa nakatakdang dagdag-buwis sa langis sa ilalim ng Tax Reform for Acceleration and Inclusion (TRAIN) law, at ang pahayag ng Transportation department na huwag na munang ituloy ang fare hike bilang mga dahilan para sa bawas-pasahe.
Sinabi naman ni Laban Konsyumer president Vic Dimagiba, dapat puwersahin ng Department of Trade and Industry (DTI) ang mga negosyante na bawasan ang presyo ng kanilang mga produkto kasunod ng rollback.
Batay sa kaniyang tantiya, nasa 10 hanggang 13 porsiyento ang natitipid ng mga negosyante sa delivery ng kanilang mga produkto nang magsimula ang mga bawas sa presyo ng langis.
Anya, sabay-sabay nagtapyas ang mga kompanya ng langis ng presyo- P2.30 kada litro ng gasolina, P2 kada litro ng diesel, at P1.85 kada litro ng kerosene kahapon.
Ito na ang pinakamalaking halaga ng bawas sa presyo ng produktong petrolyo sa loob ng limang linggo.
Pero kontra ang Federation of Jeepney Operators and Drivers Association of the Philippines (FEJODAP) sa hirit ng tapyas-pasahe.
Paliwanag ni FEJODAP president Zeny Maranan, matagal na ang hirit nilang dagdag-pasahe pero ngayon lang napagbigyan.
Dagdag niya na may mga tsuper pa ring hindi pa nakikinabang sa dagdag-pasahe dahil hindi pa sila nakakakuha ng fare matrix.
Kung ibabalik daw sa P39 per liter ang presyo ng krudo, doon na magiging bukas ang kaniyang hanay sa hirit na fare rollback.
Sinabi ni LTFRB Board Member Aileen Lizada na prayoridad nila ang petisyon ng UFCC dahil 45 milyong commuter ang apektado ng fare hike.
- Latest
