MANILA, Philippines — Isang lalaki na umano ay suspek sa panghahalay ang natagpuang patay sa gilid ng national highway, Purok 4, Brgy. Labu-o, President Roxas, North Cotabato.
Ang biktima ay kinilalang si Jaiwart Lumawag Montejo, 44, rubber tapper na residente ng Purok 1, Brgy. Camutan Antipas, North Cotabato. Nagtamo ang biktima ng siyam na bala sa iba’t ibang bahagi ng kanyang katawan.
Ang bangkay ng biktima ay natagpuan noong Oktubre 19 na positibong kinilala ng mga kaanak.
Ayon sa kaanak na noong pang Setyembre 27 naiulat na nawawala ang biktima na pinaniniwalaang pinatay ito ng kanyang nakaaway.
Pinabulaanan naman ng pamilya ang report na ang biktima ay suspek sa kaso ng panggagahasa sa kanilang lugar kaya sinitensiyahan ng kangaroo court ng NPA.