Disiplina, solusyon sa kaunlaran ng bansa
MANILA, Philippines — Hinimok ni Pasig River Rehabilitation Commission Executive Director Jose Antonio “Ka Pepeton” E. Goitia ang taumbayan na pairalin ang disiplina upang mapigilan ang labis na pagtatapon ng mga basura sa daluyang tubig at tributaryo ng Ilog Pasig.
Kamakalawa ay pinangunahan ni Goitia at kanyang mga River Warriors na linisin ang malahalimaw na basura sa ilalim ng Sevilla Bridge sa pagitan ng mga lungsod ng Mandaluyong at San Juan City.
“Hindi kaya ng mga local government units ang paglilinis ng sobrang dami ng basurang ito. Pati ang MMDA (Metro Manila Development Authority), hirap na rin. Kaya nakikiusap kami sa taumbayan, tumulong naman sila at igalang ang kalikasan,” pahayag ni Goitia.
Iginiit pa ng PRRC head na matibay na disiplina lamang ang dapat pairalin ng mamamayan upang hindi na masalaula ang kalikasan.
“Nakikiusap ako sa ating mga kababayan, mahalin natin ang ating kalikasan. Hindi natin makakamit ang lubos na tagumpay at magiging mahirap para sa atin kung hindi makikiisa ang mga Pilipino sa mga layunin ng ating mahal na Pangulong Rodrigo Duterte tungo sa pagbabago,” hiling pa ni Goitia.
- Latest
