Post Valentine date ambush...
MANILA, Philippines — Namatay noon din ang isang pulis habang kritikal ang lover nito matapos na sila ay pagbabarilin habang lulan ng sasakyan sa loob ng isang motel kamakalawa ng gabi sa Brgy. Oranbo, Pasig City.
Ang nasawi dahil sa mga tama ng bala sa iba’t ibang bahagi ng katawan ay kinilalang si SPO2 Ernesto Sanchez, 53, nakatalaga sa Southern Police District-Drug Enforcement Unit (DDEU) sa Lawton Avenue, Taguig City.
Nasa kritikal na kalagayan sa Pasig City Medical Center ang babaeng ka-date ni SPO2 Sanchez na si Josebel Polo, 20, residente ng Marinela Street., Brgy. Addition Hills, Mandaluyong City.
Batay sa ulat, bago nangyari ang pamamaril sa mga biktima dakong alas-11:20 ng gabi sa loob ng bisinidad ng Country Lodge Hotel na matatagpuan sa Danny Floro Street., ay sakay ang mga ito ng kulay puting Toyota Fortuner (BEJ-975) para sa kanila sanang post-Valentine date.
Nang biglang sumulpot ang isang kulay itim na Toyota Revo (XAY-567) na sinasakyan ng dalawang lalaki na armado ng armalite rifle at shotgun ay pinagbabaril ang mga biktima sa loob ng kanilang sasakyan.
Nang maisagawa ang pamamaril ay tumakas ang mga suspek na sinamantala ang pagkakagulo ng mga tao sa paligid.
Sinisilip ang motibo ng pamamaril kung tungkol sa trabaho ng pulis o love triangle.