Retired PNP General todas sa sunog

MANILA, Philippines — Nasawi sa suffocation sa loob ng banyo ang isang retiradong heneral ng Philippine National Police matapos ma-trap sa nasusunog niyang bahay sa isang eksklusibong subdibisyon sa Makati City, kamakalawa ng gabi.

Ang biktima na natagpuan sa loob ng banyo ng kanyang bahay sa #23 Jupiter Avenue cor. Comet Street sa Brgy. Bel-Air Village, Makati ay si Joven Gongora, 76-anyos.

Batay sa ulat ng Makati City Fire Department, bandang alas-10:45 ng gabi nang sumiklab ang apoy sa loob ng bahay ni Gongora na mabilis umakyat sa ikalawang alarma at idineklarang fire out dakong alas-11:30 na ng gabi.

Sa ginawang “mapping operation”, natagpuan ang bangkay ni Gongora sa loob ng banyo ng kanyang bahay kung saan nagkulong siya para mailigtas ang sarili ngunit nasawi pa rin dahil sa matinding usok.