MANILA, Philippines - Namatay habang ginagamot sa ospital ang isang 3-anyos na batang lalaki nang mabagsakan ng mga nakasalansang hollow block mula sa ginagawang bahay kamakalawa ng hapon sa Old Sta. Mesa, Maynila.
Ang nasawi dahil sa pagkabasag ng matigas na bagay sa pisngi ay kinilalang si John Brandon Garcia, ng 4886 Int. 22 San Roque St., Old Sta. Mesa, Maynila.
Batay sa ulat, bago nangyari ang aksidente dakong ala-1:20 ng hapon sa may 4886 Int. 22 San Roque St. Old Sta. Mesa, Maynila ay naglalaro umano ang bata sa nire-renovate na bahay ni Ronhel Claud, 31 nang aksidenteng mabagsakan ng mga hollow blocks na isinalansan ni Fracisco Barcial Jr., 42, construction worker.