LPG refilling station sumabog: 23 sugatan

MANILA, Philippines – Nasa 23 katao ang nasugatan  sa naganap na dalawang pagsabog sa isang liquefied petroleum gas (LPG) refilling station, na nauwi pa sa sunog sa Barangay San Miguel, Pasig City kahapon ng madaling araw.

Batay sa ulat, dakong ala-1:06 ng madaling araw nang maganap ang insidente sa Omni Gas Corporation, na nagre-refill ng mga LPG tanks, na matatagpuan sa Sandoval Avenue sa Barangay San Miguel ng lungsod.

Lumilitaw na naipong LPG fumes ang siyang pinagmulan ng pagsabog, na nauwi sa sunog, at nadamay ang mga kalapit na bahay, isang hardware store at maging ang ­Flying V gas station.

Ilan sa mga nasu­gatan ay nakilalang sina Epifanio Ausa, 50, na manggagawa sa isang kalapit na furniture store, na sinasabing nadaganan ng isang bumagsak na bahagi ng pader; at mga empleyado ng Ragasco na nakilalang sina Adonis Munoz, 22; Jayro Soriano, 22; Jectopher Cawili, 21; Romeo Eugenio, 28; Camilo Alcaraz, Jr, 18;Alejandro Conrad, 42; Raymundo Saturnino, 20; Jason Dagaw, 25; Philip Villota, 28; Domingo Guira, 29; Jeffrey Eugenio, 35; Raymart Eda, 22; Joel Eda, 28; Ramil Reden, 21; Arvin Bautista, 20; Jeter Brillantes, 25; Noriel Salamio, 22; Bryan Ludrico, 20 at William Khey, 39 na isinugod sa Rizal Medical Center, Pasig City General Hospital at Mandaluyong Medical Center.

Nabatid na ang 13 sa mga pasyente ay kritikal ang kondisyon matapos na magtamo ng 3rd deg­ree burns.

Lumalabas na ang mga ay naipong LPG fumes sa loob ng storage area ng refilling station na naging sanhi ng pagsabog na ikinasira ng mga bahay, bumagsak ang kisame, may mga bumagsak na pader at may mga nabasag na salamin.

Dakong ala-1:21 ng madaling araw ay ini­akyat na sa ikalimang alarma ang sunog ngunit kaagad itong naideklarang under control dakong ala-1:57 ng madaling araw at tuluyang naapula pagsapit ng alas-3:10 ng madaling araw. Aabot sa P20 mil­yon ang napinsalang mga ari-arian.