MANILA, Philippines – Hinatulang makulong ng 60 taon bawat isa ang limang opisyales ng Department of Public Works and Highways (DPWH) matapos mapatunayang guilty sa two counts ng estafa at two counts ng graft bawat isa.
Ang kaso ay may kinalaman sa reklamo ng tanggapan ng Ombudsman sa Sandiganbayan hinggil sa P7.8 million “ghost” repairs at pagbili ng spare parts ng DPWH service vehicles noong 2001.
Ang mga nahatulan ay sina DPWH Director III Burt Favorito, Officer-in-Charge Assistant Director Florendo Arias, Chief Maximo Borje, Equipment Inspector Rolando Castillo, Chief Erdito Quarto na guilty sa two counts of Estafa through Falsification of Public Documents at two counts ng graft.
Umaabot sa 20 taon ang kulong ng bawat isang DPWH official sa 2 counts ng graft at 40 years na kulong ang hatol bawat isang DPWH official sa 2 counts ng kanilang kasong estafa o umaabot sa 60 taong kulong kada opisyal ng DPWH.
Isang count naman ng estafa o 20 taon kulong at isang count ng graft o 10 taong kulong ang hatol ng korte laban kina Officer-in-Charge Nelson Umali at Storekeeper Felipe San Jose gayundin sa car repair shops Janette Bugayong ng GK & J Auto Repairs, Augusto Capuz ng BIZTRADE at Vicente Santos ng VIC-SAN Motorworks na kakutsaba sa ghost repair. Ang bawat isa sa mga ito ay may-tig 30 taong kulong sa kasong graft at estafa.
Bukod sa kulong, ang mga akusado ay pinagbabayad ng danyos pabor sa gobyerno ng halagang P7,866,631.00 bilang civil liability.
Ang mga tauhan naman ng DPWH ay hindi na pinapayagan ng batas na makapag trabaho sa alinmang posisyon sa gobyerno, kanselado ang kanilang civil service eligibility at inalis ang retirement benefits.
Napatunayan ng Ombudsman prosecutors na ang mga akusado ay nagkutsabahan para ma-reimbursement ang halagang P7,866,631.00 na sinasabing isinailalim sa repair at bumili ng spare parts ng may 192 sasakyan ng DPWH kahit hindi totoo.