MANILA, Philippines – Pinatay o nagpakamatay?
Ito ang katanungan ng mga otoridad tungkol sa isang binata na natagpuang patay sa loob ng kanyang nakaparadang sasakyan sa parking area ng isang hotel sa Pasay City kahapon ng umaga.
Ang biktima na nakilala sa pamamagitan ng nakuhang ID sa katawan nito na si Jose Florencio, 33, binata, empleyado, at naninirahan sa #40 Bulacan St., West Avenue, Barangay Bungad, Quezon City.
Batay sa ulat, alas-9:25 ng umaga nang matagpuan ang bangkay ng biktima sa loob ng kanyang sa parking area ng Base 2 Remington Hotel na matatagpuan sa Villamor Airbase ng lungsod ng sekyu na si Maniel Katarungan, 27, ng Lanting Security Agency.
Ayon kay Katarungan na nakalanghap siya ng masangsang na amoy mula sa nakaparadang kulay gray na Honda City na may plakang UZQ- 474 sa slot no. 25, basement 2 sa parking area ng nasabing hotel at nang kanyang silipin ay nakita ang biktima na nakasaklob sa ulo ang isang transparent plastic, na may nakalagay na hose na naka-konekta naman sa isang cylinder balloon tank na may laman na hinihinalang helium gas (ginagamit na pampahangin sa lobo).
Kaagad na ipinagbigay alam ni Katarungan sa hotel security management ang insidente na siya namang nag-report sa pulisya.
Nabatid na huling nakitang buhay ang biktima noong Enero 30 nang mag-check-in ito at tumuloy sa room 5065 at lumabas ito kinabukasan ng alas-5:04 ng hapon.
Ayon sa pulisya, intact naman ang mga personal na gamit ng biktima at nalaman din na mahilig umano itong maglaro sa casino.
Aalamin kung nahagip ng CCTV camera ang pangyayari upang malinawan ang insidente.