Pulis hindi imbitado sa birthday party, nagwala

MANILA, Philippines – Kalaboso ang isang bagitong pulis nang magwala at namukpok ng baril sa isang birthday party matapos na hindi siya imbitahan kamakalawa ng gabi sa Caloocan City.

Ang suspek na nahaharap sa mga kasong slight physical injury, trespassing at malicious mischief ay si PO1 Jake Valleroso, nakatalaga sa Regional Public Safety Battalion sa Camp Bagong Diwa, Taguig City matapos na ireklamo ng mga biktimang sina Bryan Cayabyab, 21, estudyante; Richard Cleofe, 48; at Angelina Soriano-Cayabyab, 44, pawang mga residente ng No. 87 M. Peralta Street, Brgy. 63, ng naturang lungsod.

Batay sa ulat, dakong alas-11:45 ng gabi sa kanto ng 10th Avenue West at Peralta Street na kung saan may birthday party ay dumating ang suspek na lango sa alak ay agad na tinutukan ng baril ang mga biktima at pinukpok ng baril sa ulo si Cayabyab.

Sa takot na tuluyang mamaril ang suspek, nagsitakbuhan sa kanilang bahay ang mga biktima ngunit sinundan pa rin umano ni Valleroso at sinisira ang pinto ng bahay hanggang sa dumating ang mga tauhan ng barangay at Police Community Precinct 2 na siyang umaresto sa suspek.