MANILA, Philippines – Walang karapatan ang Taiwan o ang sinuman na magreklamo.
Ito ang reaksyon kahapon ng Armed Forces of the Philippines (AFP) sa pakikiisa ng Taiwan sa China matapos itong umalma na rin sa isinagawang ‘freedom voyage’ ng isang grupo ng kabataang estudyante upang iprotesta at igiit na pag-aari ng Pilipinas ang teritoryong pinag-aagawan sa West Philippine Sea.
“ They did not disturb or harm anyone. We find no reasons for others to complain,” pahayag ni AFP Spokesman Col. Restituto Padilla bilang tugon sa pagpalag ng Taiwan sa ‘freedom voyage ng “Kalayaan Atin Eto” ng grupo ng kabataan.
Nabatid na pinalagan ng Taiwan Ministry of Foreign Affairs ang ‘freedom voyage’ dahil nakakasira umano ito sa kapayapaan, istabilidad sa isyu ng West Philippine Sea at nilalabag din ng mga estudyante ang soberenya ng kanilang bansa.
Ang grupo ng kabataan na nasa 47 ang bilang ay nakarating at nag-camping sa Pag-asa Island, isa sa mga islang inookupa ng Pilipinas sa pinag-aagawang teritoryo sa West Philippine Sea noong Disyembre 27, 2015.
Samantalang aabot naman sa 38 pa sa mga ito ay naiwan sa Puerto Princesa City, Palawan.
Si dating Marine Captain Nicanor Faeldon, isa sa mga namuno sa bigong pag-aaklas laban sa administrasyon ni dating Pangulong Gloria Macapagal Arroyo noong Hulyo 2003 ang nag-organisa at nagsusuperbisa sa freedom voyage bilang protesta sa pambu-bully ng China sa mga bansang kaagaw nito. Tinangka naman ng AFP na pigilan ang mga kabataan na maglayag patungong Pagasa Island pero hindi nagpaawat at itinuloy ang kanilang plano.