MANILA, Philippines – Halos maputol ang daliri sa kanang kamay ng 10-anyos na totoy matapos itong masabugan ng ipinagbabawal na piccolo, isang araw bago sumapit ang pagsalubong sa Bagong Taon sa Barangay Comon sa bayan ng Infanta, Quezon.
Sa ulat na nakarating sa tanggapan ni Quezon PNP Director P/Senior Supt. Ronaldo Genaro Ylagan, kinilala ang biktima na si Jhon Oliver Quindoza ng nasabing barangay.
Base sa imbestigasyon, dakong alas-10 ng gabi ay nakatuwaan ng biktima na sindihan ang ilang piraso ng piccolo na kanyang binili sa palengke noong umaga ng December 30, 2015.
Subalit bago pa man maihagis ng biktima ang piccolo ay bigla na lamang itong pumutok sa kanyang kamay na naging dahilan ng pagkasugat nito.
Mabilis na isinugod sa Claro M. Recto District Hospital ang biktimang laylay na ang duguang daliri.