MANILA, Philippines – Tinapos ng dalawang lalaki ang kanilang matagal nang alitan matapos na magkrus ang kanilang landas sa isang sayawan at dito naganap ang pananaksak na ikinasawi ng isa sa kanila kamakalawa ng gabi sa Purok Tungao, Barangay Proper Ned, Lake Sebu, South Cotabato.
Ang biktima na namatay noon din ay kinilalang si Deos Tigo, 35, residente ng nabanggit na lugar.
Ang suspek na tumakas ay kinilalang si Gaudencio Wari, isang miyembro ng Cafgu.
Batay sa imbestigasyon, dakong alas-11:00 ng gabi sa isang sayawan sa nasabing lugar ay nagkita ang biktima at suspek at dito ay muling naungkat ang kanilang matagal nang alitan sa hindi pa malamang kadahilanan.
Nagkaroon nang pagtatalo ang dalawa hanggang sa bumunot ng patalim ang suspek at sinaksak sa tiyan ang biktima na ikinasawi agad nito.