Tattoo artist itinumba ng pulis
MANILA, Philippines - Napaslang ang isang tattoo artist na nagmomotorsiklo matapos itong sitahin at pagbabarilin ng isang pulis kahapon ng madaling araw sa Pasay City.
Napuruhan sa dibdib ang biktimang si Mark Hernandez ng #163 Saint Claire St., Barangay 178, Maricaban sa nasabing lungsod.
Nasa custody naman ng Pasay City PNP ang suspek na si PO3 Harley Cervantes na nagti-training ng Junior Leadership Course sa National Capital Regional Police Office sa Camp Bagong Diwa, Bicutan, Taguig City at dating nakatalaga sa SWAT Team ng Pasay City PNP.
Base sa police report, naganap sa harapan ng bahay sa #13 Saint Theresa St., Barangay 179, Maricaban nang sitahin ng suspek ang biktimang lulan ng motorsiklo dahil wala itong plaka at may dala itong baril.
Gayon pa man, nagalit si Hernandez kung saan tinangkang putukan si PO3 Cervantes subalit inuhan siyang pagbabarilin.
Itinanggi naman ng kampo ng biktima ang version ni PO3 Cervantes kung saan walang kalaban-labang pagbabarilin ni PO3 Cervantes.
Sumuko naman si PO3 Cervantes sa himpilan ng pulisya at nakatakdang kasuhan.
Narekober sa crime scene ang isang homemade cal. 22 pistol, isang gun replica, 2 basyo ng cal. 9mm pistol, at isang pakete ng valium (10 mg.).
- Latest
