MANILA, Philippines – Hindi na umabot ng buhay ang isang karpintero nang ito pagsasaksakin ng kapatid na lalaki ng kanyang tenant na kanyang nakasagutan kamakalawa ng gabi sa Las Piñas City.
Ang nasawi dahil sa mga tinamong saksak sa ibat ibang bahagi ng katawan ay kinilalang si Robert Garvez Gaspay, 48, ng Block 4, Lot 15, Madrigal Compound, Barangay Daniel Fajardo ng naturang lungsod.
Ang suspek na tumakas ay kinilalang si Rodrigo Abadines, 30, binata, delivery boy, nakatira sa naturang lugar.
Bago ang insidente, dakong alas-10:30 ng gabi sa Block 4, Lot 15, Madrigal Compound, Barangay Daniel Fajardo ay pinuntahan ng biktima ang suspek na pansamantalang nakatira sa kanyang kapatid na si Jennylyn Abadines na tenant ng una.
Sa hindi pa malamang kadahilanan ay kinompronta ng biktima ang suspek na nauwi sa mainitang pagtatalo kaya’t kumuha ng patalim si Rodrigo at walang kaabog-abog na sinaksak ang biktima.