Tandem umatake: 1 patay, 2 sugatan

MANILA, Philippines – Napatay ang isang lalaki habang dalawa ang nasugatan nang sila ay pagbabarilin ng riding in tandem suspek sa magkakahiwalay na ambush sa Binalonan at Natividad, Pangasinan.

Ang nasawi ay kinilalang si Teofilo Malapitan, 61, habang malubhang nasugatan ang driver ng motorsiklo na si Sergio Cayabyab, 58.

Nabatid na ang dalawa ay kagagaling lamang sa bahay ni Brgy. Kagawad Rafael Legaspi Jr., at pauwi na sa kanilang mga bahay at binabagtas ang silangang direksyon nang pagbabarilin ang mga ito pagsapit sa lugar.

Sa isa pang insidente, bandang alas-7:30 naman ng umaga kamakalawa nang pagbabarilin rin ng riding in tandem na mga suspek ang negosyanteng si Jesus Espique, 65, sa kahabaan ng highway ng Brgy. Poblacion West, Natividad ng lalawigang ito.

Nagtamo ito ng tama ng bala sa ulo at patuloy na isinasalba matapos na ilipat sa Villaflor Medical Hospital sa Dagupan City.