MANILA, Philippines – Pinagbabaril ang isang lalaki na kandidato sa pagka-konsehal ng hinihinalang gun for hire noong Linggo ng umaga sa Midsayap, North Cotabato.
Ang biktima na nasawi ay kinilalang si Bong Mangadta, 43, ng Muslim Village, Purok 26, Barangay 76-A, Bucana sa Davao City.
Napatay rin ang gunman nito na patuloy pang kinilala ng mga otoridad.
Batay sa ulat, dakong alas-8:45 ng umaga ay nakaupo sa labas ng isang tindahan ang biktima katabi ang misis nito nang sumulpot ang suspek at malapitang barilin sa ulo.
Mabilis na nakahingi ng tulong ang mga saksi sa mga otoridad at itinuro ang lugar na tinakbuhan ng suspek.
Sa halip na sumuko ang suspek nang ito ay makorner ay nakipagbarilan ito sa mga otoridad na naging dahilan ng kanyang kamatayan.