MANILA, Philippines – Malubhang nasugatan ang isang kapatid ng notoryus na Abu Sayyaf Group makaraang makasagupa ang tropa ng militar sa Brgy. Liang, Patikul, Sulu kahapon ng tanghali.
Kinilala ni Joint Task Group (JTG) Sulu Commander Brig. Gen. Alan Arrojado ang malubhang nasugatang bandido na si Ben Saudi, mula sa grupo ni Commander Ajang –Ajang, kaalyado ng Abu Sayyaf na sangkot rin sa illegal na aktibidades.
Sinabi ni Arrojado na si Ben Saudi ay kapatid ni Aljin Jaelan Mundok alyas Ninok Saparri, isa sa mga Sub-Commander ng Abu Sayyaf na sangkot sa kidnapping for ransom.
Nabatid na bandang alas-11:20 ng tanghali kahapon ay nagsasagawa ng special operations ang tropa ng militar nang masabat ang grupo ni Ajang-Ajang.
Nabatid pa na ang suspek ay may nakabinbing warrant of arrest kaugnay ng pagkakasangkot nito sa pagdukot sa mag-asawang Aleman na sina Victor Okonek at Herike Diesen noong 2014 sa Palawan na itinago sa Sulu.