MANILA, Philippines - Kapwa nasawi ang dalawang driver matapos na magsalpukan ang kanilang minamanehong motorsiklo kamakalawa ng gabi sa kahabaan ng national highway sa San Marcelino, Zambales.
Ang mga nasawi ay kinilalang sina Darryl Lester Sabado, 26, residente ng Bgy. San Isidro, at Eunil Ogao-Ogao, 22, collector, tubong- Iligan Lanao Del Norte, at naninirahan sa Bgy Linasin, kapwa sa San Marcelino, Zambales.
Malubha namang nasugatan ang pasahero ni Ogao-Ogao, na si Maybelyn Doblado, 20, dalaga, sales representative, at naninirahan sa Upper Kalaklan Olongapo.
Sa imbestigasyon ni PO1 Eric Castillo, bago nangyari ang aksidente dakong alas-7:00 ng gabi ay mabilis na minamaneho ni Sabado ang kanyang motorsiklo sa pagbaybay sa nasabing highway patungo sa direksyon ng Castillejos, Zambales.
Dahil sa mabilis nitong takbo ay hindi nito napuna ang kasalubong na motorsiklo na minamaneho ni Ogao-Ogao na patungo naman sa Brgy. Poblacion.
Sa lakas ng banggaan ay kapwa tumilapon ang dalawang drayber ng ilang metro at lumagapak sa sementong kalsada.
Ang dalawang rider ay isinugod sa San Marcelino District Hospital,subalit kapwa idineklarang dead ona arrival.