20-taon kulong sa may-ari ng security agency na hindi nagre-remit sa SSS

MANILA, Philippines – Dalawampung taon na pagkakulong ang inihatol ng Regional Trial Court ng San Fernando, La Union  laban sa may-ari ng  isang security agency na bigong mag-remit sa  Social Security (SSS) ng contributions  sa kanyang mga security guards.

Batay sa desisyon ni RTC Branch 66 Presiding Judge Victor O. Concepcion  ang naisampang kaso laban kay Fred Ventura, Operations Manager ng Guardsman Security Agency and Detection Group sa San Fernando City, La Union matapos mapatunayang nagkasala sa kasong paglabag sa  Social Security Act of 1997 bunga ng pagbabawas ng kumpanya ng SSS contribution ng mga guwardiya nila pero hindi naire-remit sa tanggapan ng SSS.

Si Ventura ang nakarehistrong may-ari ng Guardsman noong May 2010 na kanyang itinatanggi makaraang kasuhan ng SSS sa hindi pagbabayad ng premiums mula September 2010 hanggang  March 2011.

Pinaalalahanan ng SSS ang iba pang employers na huwag tutularan si Ventura dahil parusa ang katapat nito sa bandang huli.