Tserman na tatakbong mayor binaril sa ulo

MANILA, Philippines – Nasa kritikal na kalagayan ang isang 65-anyos na barangay chairman matapos na barilin sa ulo ng hindi pa kilalang suspek habang pauwi ng bahay sa Zone 3, Brgy. Tambo, Pamplona, Camarines Sur, kamakalawa ng gabi.

Ang biktima na inoobserbahan sa intesive care unit ng Mother Seton Hospital ay kinilalang si Domingo “Inggo” Briones, may-asawa, chairman ng nasabing barangay.

Batay sa ulat, dakong alas-11:20 ng gabi ay pauwi na ang biktima mula sa pagdalo sa piyesta ng kanilang barangay nang ito ay lapitan ng hindi pa kilalang suspek at binaril sa ulo.

Lumalabas sa imbestigasyon ng pulisya na ang biktima ay nagbabalak na tumakbong mayor ng kanilang bayan sa 2016 elections na siyang tinitingnan na anggulo.