MANILA, Philippines - Pinagbabaril ng dalawang lalaki na sakay ng isang motorsiklo ang tatlong katao kabilang ang isang babae sa Iligan City, Lanao del Norte kamakalawa.
Ang mga nasawi ay kinilalang sina Ramil Magalop, 39; alyas Cris at ang babae na alyas Ophel.
Sa ulat ni Supt. Orlando Benas, Director ng Iligan City Police, dakong alas-12:10 ng madaling araw nang dumating sa lugar ang dalawang lalaki na sakay ng isang motorsiklo at pinasok ang bahay ni Magalop na matatagpuan sa Consunji St., Brgy. Poblacion at walang sabi-sabing pinagbabaril ang mga biktima sa ulo.
Mabilis na nagsitakas ang mga suspek at sa pagresponde ng mga otoridad ay narekober sa lugar ang ilang sachets ng shabu, drug paraphernalias at humigit kumulang na P 200.000 cash na hinihinalang pinagbentahan ng mga biktima sa droga at mga basyo ng bala ng kalibre .45 baril.
Pinaniniwalaan ng mga otoridad na onsehan sa droga ang motibo ng pamamaslang.