MANILA, Philippines – Magkakayakap na natagpuang patay ang tatlong paslit sa silid matapos na nakulong sa nasusunog nilang kuwarto nang iwan sila ng kanilang nanay kamakalawa sa Calamba City, Laguna.
Ang magkakapatid ay kinilalang sina Kurth Andrew, 5; Justine Maru, 4 at Kyla Jane Lamsen, 2.
Sa ulat ng hepe ng fire department na si C/Inspector Edwin Vargas na dakong alas-2:40 ng hapon nang maganap ang sunog sa Block 3, Lot 2 at 3, Calle Simpatico, Phase 2, Villa Remedios, Brgy. Halang ng nasabing bayan.
Bago ito, dakong ala-1:45 ng hapon ay sandaling iniwan ng ina ang tatlo niyang anak para tumaya sa kalapit na STL outlet at bandang alas-2:40 ng hapon nang bumalik sa bahay ay naamoy na ang usok mula sa silid ng mga anak.
Pagbukas ng pinto ay sumalubong ang makapal na usok na bumalot na sa buong silid dahil sa nasusunog nilang sofa.
Agad na hinanap ang tatlong anak at duon na niya natagpuan ang mga ito na nasa isang sulok na pinaniniwalaang nasawi dahil sa suffocation.
Mabilis na napatay ang sunog at hindi na kumalat pa sa buong kabahayan.
Malaki ang hinala ng pulisya na naglaro ng posporo ang tatlong paslit.